Qarabagu mund të jetë i kënaqur me fitoren në Shkup ndaj Shkëndijës (0-1), pasi ky ishte hapi i parë drejt kualifikimit për në fazën play-off të Ligës së Kampionëve, njofton Telegrafi.

Trajneri shumëvjeçar i skuadrës, Gurban Gurbanov, i cili tashmë prej 18 vitesh është në krye të gjigantit azerbajxhanas, foli për mediat pas ndeshjes lidhur me paraqitjen e ekipit të tij.

“Së pari dua t’i përgëzoj lojtarët e mi që luftuan deri në fund dhe luajtën me intensitet. Është shumë e rëndësishme që në ndeshje të tilla të jesh luftarak deri në fund. Bëmë disa gabime, por për ne ishte shumë i rëndësishëm rezultati i kësaj sfide. Kam fjalët më të mira për Shkëndijën, luajtën shumë mirë ndaj FCSB-së dhe na e vështirësuan punën. Fitorja është e rëndësishme për ne, por në Baku duhet të jemi të kujdesshëm, nuk duhet të lejojmë që ndeshja të jetë kaq e ngushtë,” – deklaroi Gurbanov.

Ndeshja e kthimit mes Qarabagut dhe Shkëndijës do të luhet më 12 gusht, në orën 18:00, në kryeqytetin e Azerbajxhanit Baku.

Fituesi i këtij çifti do të përballet në fazën play-off të Ligës së Kampionëve me fituesin e përballjes Ludogorets – Ferencvaros, ndërsa humbësi do të kalojë në play-off të Ligës së Evropës ku do të luajë pikërisht ndaj humbësit të të njëjtit çift.